2011-12-01 18:51 228 0 تعليق

( ورجعت الأيام الحلوة)

بقلم / ميادة مدحت

الثورة نجحت يا جدعان ! خالد سعيد مراحشى هدر ومينا دانيال مراحشى بلاش وأهو الجنزورى حبيب الملايين عاد من تانى والورد هلت أنواره! وبعد ما الموجه الأولى من ثورة يناير حدفت علينا الغضنفر عصام شرف ..أهى الموجه التانية جابت لنا الجنزورى ومش مهم بقى جابته منين المهم ان لقا الاحبة بعد الغياب له لذة وبصراحة الراجل لذيذ وزى العسل حتى شوفوه فى أول مؤتمر صحفى بعد تكليفه من العسكر برئاسة الوزرا وهو بيقول : “وأهو القدر أراد وادينى رجعت لكم تانى بعد أكتر من 10 سنين”.. تعرفوا ان ربنا قادر فعلا يحيى العظام وهى رميم وان الرجل ده مبعوث العناية الإلهية ولا إله إلا الله والجنزورى حبيب الله.

وأيام الجنزورى – المتخصص فى التخطيط-
كانت أيام لها تاريخ لما كان طلعت بيه حماد يصول ويجول فى ولا حد يستجرى يقول له: بم ما هو حبيب الجنزوى بقى. والرجل المخطط وضع لنا خطط فتاكة والدليل على كده الحالة اللى احنا فيها النهاردة والرخاء اللى بيرخ على دماغ اللى جابونا.. وأهو رجع بسلامته من تانى علشان يوعد الشعب المصرى الحبيب بأنه لو ربنا مد فى عمره هنشوف توشكى هتبقى ازاى !!!!!!!!!!

- توشكى ؟ ربنا مد فى عمره؟ يا لهوى هو الرجل ده جاى رئيس حكومة فترة انتقالية ولا ناوى يعمر معانا؟ ولا هو هيفضل قاعد معانا لغاية ما ربنا ياخده؟ وبعدين توشكى ايه ؟ مش ده المشروع اللى حاولوا يمجدوا بيه مبارك وفشلوا لأنهم مراعوش فيها صغار المستثمرين وكان كل همهم يوصلوا الخدمات لأرض الوليد بن طلال اللى اشتراها ببلاش ورجع اهداها للشعب المصرى ! أرضنا وبيهادينا بيها شفتوا البجاحة؟ واللى فرحانين فرحة الاهبل بالجنزوى يكونوش من أنصار الخصخصة اللى بدأت فى عهده واتحولت لعملية بيع وطن بالجملة والقطاعى تحت شعار اشترى حته وخد حتتين مجانا؟ ما تفوقوا وتفتكروا ان الرجل ده الوزرا اللى فى وزارته الاولى كانوا من امثال عاطف عبيد وصفوت الشريف وان أغلبهم فى لومان طرة دلوقتى.

هيطلع الاخ عمرو دياب يقوللى : ما بلاش نتكلم فى الماضى هأقوله ماشى خلينا فى الحاضر وجماله : دلوقتى فيه ثورة حصلت ولا اللى حصل ده كان زلزال 1 ريختر وخلاص؟ فيه ناس ضحت بروحها فى التحرير ومحمد محمود وعندهم قايمة أسماء محترمة واتفق اغلبهم على البرادعى لرئاسة حكومة انقاذ وطنى ولا لأ؟ كمال الجنزورى رجل فلة بس عنده كام سنة النهاردة ؟ ايه الفكر الجديد اللى ممكن يقدمه؟ أقولك انا الرجل جه رغم انه عارف ان الميدان رافضه – والميدان هو الشرعية الوحيدة أيوه انا بقى ديكتاتورية والميدان هو
اللى يحكم – وأول حاجة عاملها ابن الجنزورى انه استقبل شباب لجنة
السياسات والمجالس القومية المتخصصة بتاعة مبارك وجمعية المستقبل وراح مطلع اخبار فى الاعلام (العسكرى) أنه قابل شباب الثورة وخد رأيهم ..ثوار مين ورأيهم فى ايه ؟ معرفشى!

وبنظرة سريعة على الجزء الثانى من مسلسل الجنزوى هنلاقى فكر جديد فعلا فى الأسماء اللى اتسربت كمرشحين للحقائب الوزارية بتكشف لنا عن الفكر الثورى لأبو كمال خد عندك مثلا: الاعلامى الكبير عادل حمودة لوزارة الإعلام وخصوصا انه اكتر واحد فى مصر عنده علم باللى بيحصل فى أود نوم مصر كلها ومش بس كده كان بيشوف ان واجبه انه يعلمنا احنا كمان باللى عرفه فكانت روز اليوسف أيام رئاسته لتحريرها ومن بعدها “الفجر” أودة نوم مفتوحة ع البحرى والرجل الحقيقة مكدبشى خبر وبعد ما كان بيشن هجوم نووى على المجلس العسكرى بقى رأيه ان القوات
المسلحة حلوة وان الانتخابات متأمنة بشكل جميل ولطيف وحلو اوى ومتأمنة
دايماااان.. أما الثقافة فقد تم ترشيح الفنان محمد صبحى .. أمال ما هو لازمن
وزير الثقافة يبقى فنان.. معلوم .. وده رغم إن الأخير كان مستشار لوزير الثقافة الأسبق فاروق حسنى ومسمعناش انه شار على
الحاج فاروق بشورة عدلة وده بقى غير عدد لا بأس به من اللواءات تم ترشيح واحد منهم لوزارة العدل يعنى احنا نطالب بوزير مدنى لوزارة الداخلية يقوم ابو
الجنازير يبلينا بلواء للعدل! ثورة ثورة يعنى !!

خلاصة القول ان الثوار داخلين سباق إرادة مع المجلس العسكرى وللأسف كل
المؤشرات بتقول ان الكلمة الأخيرة فى مصر بقت للعسكر والفضل يرجع للأغلبية الصامته اللى صمتت على انتهاك حريتها وسرقة قوتها ويوم ما اتكلمت نزلت ملايين تقف ملطوعه على ابواب اللجان فى
انتخابات مكانشى ينفع تتعمل من غير دستور علشان يجيبوا مجلس شعب منزوع
الصلاحيات لا هيشكل حكومة ولا هيعرف
يعمل دستور من غير تدخل العسكر واللى
يعيش فينا يفكر التانى يا مصريين بكرة
تندموا انكوا موقفتوش الوقفة دى فى
التحرير علشان تشاركوا فى آخر محاولة
لإنقاذ الثورة وتحرير مصر.

الشعب المصري ينتفض للديمقراطية قلب العروبة ..مصر ينبض من جديد